Қазіргі таңда дүкен сөрелерінде «қантсыз», «табиғи», «эко», «фитнес» деген жазулары бар көптеген өнімдер кездеседі. Алайда мұндай белгілер әрдайым өнімнің шынымен пайдалы екенін білдірмейді.

Сондықтан өнімнің құрамын оқуды күнделікті әдетке айналдырған жөн.

Неге назар аудару керек?

1. Құрамы
Өнім құрамындағы ингредиенттер мөлшеріне қарай ретімен жазылады. Егер тізімнің басында қант, сироптар, өсімдік майлары немесе дәм күшейткіштер тұрса, мұндай өнімді шектеген дұрыс.

2. Қосылған қант
Қант әртүрлі атаумен көрсетілуі мүмкін: глюкоза шәрбаты, фруктоза шәрбаты, декстроза, мальтоза, сахароза және басқа да атаулар. Қантты шамадан тыс тұтыну семіздікке, 2-типті қант диабетіне және жүрек-қан тамырлары ауруларына әкелуі мүмкін.

3. Тұз
Тұзды көп мөлшерде тұтыну қан қысымының жоғарылауына және жүрек-қан тамырлары ауруларының даму қаупінің артуына ықпал етеді.

4. Трансмайлар
Егер өнім құрамында жартылай гидрогенизацияланған майлар көрсетілсе, оны сирек тұтынған дұрыс. Трансмайлар қандағы холестерин деңгейіне теріс әсер етеді және жүрек ауруларының қаупін арттырады.

5. Жасанды қоспалар
Барлық тағамдық қоспалар зиянды емес. Дегенмен, бояғыштар, хош иістендіргіштер және дәм күшейткіштердің көп болуы өнімнің жоғары деңгейде өңделгенін көрсетеді.

Пайдалы өнімді қалай таңдауға болады?

✔ Құрамы қысқа әрі түсінікті өнімдерді таңдаңыз.
✔ Көкөністерге, жемістерге, жармаларға, бұршақ дақылдарына, балыққа және майсыз етке басымдық беріңіз.
✔ Сатып алмас бұрын ұқсас өнімдердің құрамын салыстырыңыз.
✔ Қаптамадағы жарнамалық жазуларға ғана сенбей, міндетті түрде құрамын оқыңыз.

Есте сақтаңыз

Өнімнің құрамын оқу – денсаулыққа жасалған қарапайым, бірақ маңызды қадам. Күн сайынғы саналы таңдау көптеген созылмалы аурулардың алдын алуға көмектеседі.